08-07-2019

Vastentijd

 

 

De Vastetied.

Miene kiek op de vastetied en wat höbbe de paosjeier en de paosjhaas te hiej mèt te make?

Veuraafgaond aan Paosje viere veer 3 daag carnaval; good aete en drinke um ‘ne goje baom te lègke es veurbereiding op de vastetied van 40 daag. Inmiddels is d’r haufwaegs  ‘ne rösdaag ingeveurd, Haufvaste.

Naeve ’t vleisj moch d’r (vreuger) in de vastetied ouch gein eier gegaete waere. Meh lègk die kippe mer ins oet dat ze 40 daag gein ei maoge lègke. Dus al die eier woorte gekaokt en bewaart pis Paosje. Noe sjteit ’n ei symbool veur vruchbaarheid (nuuj begin) mèt es godin Easter, wat wir Paosje beteikent.

... dan sjrief mer plat!
Laes hiej ’t artikel in de Hulsberger

Op gooje vriedig, de ein nao lètse vastedaag, woort nao pesjtoar gegange um te beechte en heivesj te gaon mèt ’n weesgegroetje of onzevader, nao gelang de beechsjöld. Daonao waor se wir gans ónsjöldig tot ’t jaor d’rop. En op de lètse vastedaag, Paosjzaoterdig, dan zint de kèrkklokke pis 12 oer sjtil, umtot ze nao Raome vlege um met paosjeier truuk te kómme. Ich höb vreuger deks um 12 oer nao de kèrktaore gekeke um dat sjpektakel te zeen, meh dat höb ich ummer gemis.

En dan is ’t Poasje! En umtot ’n haas symbool sjteit veur “ónsjöld” höbbe ze dem oetgekaoze es paosjhaas mèt ’n mendje um de erm. En mèt al dat euversjot van gekaokde eier in ’t mendje, versjtópt de paosjhaas die biej al die ónsjöldige luuj.

Is ’t waor? Ich bèn ónsjöldig: “Mijn naam is haas!“

  

De Hulsberger – jaargang 2 – editie 13 – april 2017

Wil ste mië weite euver de Limburgse sjpelling, kiek dan bv op Limburgse Sjpelling of op de Wikipedia: Sjepllingssjpiekpagina!

Helga Keulen

In 2001/2002 höb ich de Lièrgank Limburgs gevolgd dat georganiseerd woord door Veldeke en de Provincie Limburg. Sinds dae tied is de leefde veur de Limburgse Taal nog groater gewore. In 2016 haet de redactie van de Hulsberger mich gevraog um gastredacteur te zin veur de column: … dan sjrief mer plat. De sjtökke die ich gesjreve höb, kómme hiej allenèj langs. Ze gónt euver de Limburgse taal, ós dörp Hulsberg, ós Limburg of geweun get sjtómme kal.

Väöl plezeer mèt laeze!

 

Alle artikele op ’n riej
… dan sjrief mer plat!

 

Categorieën