Nederlands anti Limburgs

Nederlands anti Limburgs.

Af en toe dan google ich op internet nao ’t Limburgs of de Limburgse taal. Hiej wurt väöl euver gesjreve en ’t vilt mich op (teminste dat mein ich dan) dat ’t ummer miè luuj bezig hilt. Zoawaal ’t kalle es ’t sjrieve, meh ouch ’t acceptere es taal.

Zoa höb ich al in versjillende sjtökke gelaeze dat de Taalunie o.a. ‘t Limburgs neet miè verneumd in hun ónderzeuk, wao-op väöl waersjtand is gekómme. De Taalunie sjient bang te zin dat ’t Nederlands (es middelgroate taal) weggeduujd wurt door ’t Ingelsj, waodoor d’r sjtraks allein nog mer Nederlands gekald geit waere in de privésfeer, wat ’n groat verlees zou zin veur alle Nederlandstaligen. Um de middelgroate positie te houte, is ’t zaak um aan te gaeve wieväöl luuj d’r wièreldwied Nederlands kalle. Door de Limburgse taal neet te verneume in hun óngerzeuk, vilt dees vanzelf in Nederlands, sjuus wie in Vlaanderen, St. Maarten, Aruba, Suriname en Curaçao.

Es gevolg hiejvan is ’t te sjnappe dat o.a. Veldeke hiej in opsjtand is gekómme, zeker umtot ’t Limburgs al in 1997 Europees erkènt is es sjtreektaal. Sjienbaar negeert de Taalunie dat, umtot d’r te väöl versjillende dialecte zint. In ’t kort samegevat, deit de Taalunie mèt ’t Limburgs, wat ze neet mèt ’t Nederlands wille laote gebeure: Kal ’t Limburgs mer in de privésfeer. Of meine ze dat veer óngerling Nederlands kalle umtot veer ós angesj neet versjtónd? Sjtèl dat ’t Ingelsj sjtraks toch ós modertaal wurt, zouwe d’r gekke taferele oet kènne kómme: Limbuger: “Esse mich versjteis dan kal mer plat”. Hollender: “Wat sjeg tie nou?” Limburger: “Ik praat Limburgs, jij niet”. Ex-Nederlandstalige: “What do you say?” Limburger: “I speak Limburgs, Dutch and English, can I have that job?”

  

De Hulsberger – jaargang 3 – editie 28 – juni 2018

Wil ste mië weite euver de Limburgse sjpelling, kiek dan bv op Limburgse Sjpelling of op de Wikipedia: Sjepllingssjpiekpagina!

In 2001/2002 höb ich de Lièrgank Limburgs gevolgd dat georganiseerd woord door Veldeke en de Provincie Limburg. Sinds dae tied is de leefde veur de Limburgse Taal nog groater gewore. In 2016 haet de redactie van de Hulsberger mich gevraog um gastredacteur te zin veur de column: … dan sjrief mer plat. De sjtökke die ich gesjreve höb, kómme hiej allenèj langs. Ze gónt euver de Limburgse taal, ós dörp Hulsberg, ós Limburg of geweun get sjtómme kal.

Väöl plezeer mèt laeze!

 

---

Alle artikele op ’n riej
… dan sjrief mer plat!

 

---

Categorieën

• Gedachtenis (5)
• Gedicht van Oma (1)
• Gedichtenbundel (61)
• Hertalingen (6)
• Kamp Album (59)
• Leef je Leven (25)
• Limburgse taal (7)
• Mijn Gedichten (4)
• Sjrief mer plat (30)

 

---