10-07-2019

Namen Hulsbergse carnavalsgroepen

 

 

Name van Hölsbergse carnavalsgroepe.

Al ins sjtilgesjtange biej die name van de carnavalsgroepe? Missjien kiek se hiejnao mèt gans angere ouge nao d’n optoch.

Want, de zuls mer zoa wie ’t prinsepaar biej de “Loetsjers” huère, mèt es logo ‘ne baby mèt ’n loetsj in de mónd! En dan te bedinke dat ze zich veurhaer “Sjravelaere” neumde. Dan verwach se toch dat ze toen mer get aangemodderd höbbe en mèt ‘ne nuje naam volwassener wouwe euverkómme. Dus “Loetsjers”… uhm??? En of de groep van “Naksjebatste” dach: wat die verzinne, kènne veer ouch? Bèn benuujd wieväöl naksje batse ich zeen in d’n optoch…

... dan sjrief mer plat!
Laes hiej ’t artikel in de Hulsberger

Noe zint d’r miè groepe die oajt angesj hesje en wiër zint gegange mèt ‘ne nuje naam. Pak dich ins “De helde van toen”. Vreuger waore dat de “Penners”. Dus, tóén waore ze helde! Wat zouwe ze noe zin? En wie is ’t mèt dat sjtèlleke “Óngereigeld” en de “Beerdöpkes”? Zouwe ze ’t noe waal gereigeld höbbe en sjpare ze nog ummer beerdöpkes? En die “Knoepjoepe” dan? Ach, “Kiek Mer”, same mèt ‘ne Penner en ‘ne Knoepjoep zin ‘t 7 Carnavals Vrung. En hun vrouwluuj? “Bekiek ’t mer”!

D’r zin vas nog miè groepe gefuseerd, mer zuus te de “Knoevelaere” in d’n optoch, pak ènne vas en knoevel ‘m ins effe! ’t Kènt gebeure dat d’r waal kal in ’t dörp kump, want de “Moelemaekesj” loupe ouch mèt. En ach, wat zou ’t. Mèt al die “Klotsköp” biejein is d’n optoch in ’t Beumerwald de meujte waerd um te bekieke!

En ich weit ein dink zeker: “Ich Kiek Mèt!“

  

De Hulsberger – jaargang 2 – editie 12 – februari 2017

Wil ste mië weite euver de Limburgse sjpelling, kiek dan bv op Limburgse Sjpelling of op de Wikipedia: Sjepllingssjpiekpagina!

Helga Keulen

In 2001/2002 höb ich de Lièrgank Limburgs gevolgd dat georganiseerd woord door Veldeke en de Provincie Limburg. Sinds dae tied is de leefde veur de Limburgse Taal nog groater gewore. In 2016 haet de redactie van de Hulsberger mich gevraog um gastredacteur te zin veur de column: … dan sjrief mer plat. De sjtökke die ich gesjreve höb, kómme hiej allenèj langs. Ze gónt euver de Limburgse taal, ós dörp Hulsberg, ós Limburg of geweun get sjtómme kal.

Väöl plezeer mèt laeze!

 

Alle artikele op ’n riej
… dan sjrief mer plat!

 

Categorieën