Dameszitting

Vrouwluujzittinge in Hölsberg.

In de jaore 80 van de veurige ièuw, waor d’r nog “Oud Hulsberg”, ‘ne kaffee ónger aan de Sjoalsjtraot wat gerund woort door Erna en Hum. Ummer hièl gezellig, zoa ouch mèt carnaval. Meh wat Hölsberg neet heij, dat waor ’n Dameszitting.

Mien mam, Tien van Keulen, ging al jaore in Klumme Barebinge, wat gliekertied mèt de hièrezitting van dao gehoute woort. Vrouwluuj kaome toen biejein en hele hun eige fièske. Erna (van “oud Hulsberg”) hoort dit en sjtóng hiej waal aope veur. In 1984 waor ’t zoa wiet en de ièsjte vrouwluujzitting waor gebaore, toen nog ónger de naam Barebinge, mèt amper 20 vrouwluuj biejein. Artieste? Driej mansluuj die ’n orkes vormde, buutreedner waore en entertainmende. Umtot de zitting al vreug aafgeloupe waor, ginge veer zelf optraeje met pekskes oet de verkleidkis van Erna: Marianneke, D’n ouwe Pie en muziek mèt eige instremente. ’t Sjprèk bienao vanzelf dat ’t eker jaor drökker woort. Wie Erna gesjtop waor mèt Oud Hulsberg, höbbe Marion en Joris van ’t Heukske dit euvergenómme en umgeduipt tot Dameszitting.

In 2000, Joep en Marjo waore toen prinsepaar, is dit ivvenement euvergegange na de Trepkes en woort vanaaf toen op ‘ne angere daag georganiseerd es de Hièrezitting. Dit waor ouch de introductie van ’n ièreplaats veur de prinses mèt häör hofdames. Mèt de jaore woort ’t ummer drökker, mèt miè ónbekènde en ’n eige Trepkesmansluujzitting aan de angere kant van de zaal.

En noe, 35 vrouwluujzittinge later, bèn ich d’r achter gekómme dat ich de einsige bèn dae alle zittinge van begin aaf aan höb mètgemaak, op de voot gevolg door Desiree, die ein jaor haet verzaak. Dit ving ich ram sjiek! Höb ich dan noe ouch gewónne?

  

De Hulsberger – jaargang 3 – editie 24 – februari 2018

Wil ste mië weite euver de Limburgse sjpelling, kiek dan bv op Limburgse Sjpelling of op de Wikipedia: Sjepllingssjpiekpagina!

In 2001/2002 höb ich de Lièrgank Limburgs gevolgd dat georganiseerd woord door Veldeke en de Provincie Limburg. Sinds dae tied is de leefde veur de Limburgse Taal nog groater gewore. In 2016 haet de redactie van de Hulsberger mich gevraog um gastredacteur te zin veur de column: … dan sjrief mer plat. De sjtökke die ich gesjreve höb, kómme hiej allenèj langs. Ze gónt euver de Limburgse taal, ós dörp Hulsberg, ós Limburg of geweun get sjtómme kal.

Väöl plezeer mèt laeze!

 

---

Alle artikele op ’n riej
… dan sjrief mer plat!

 

---

Categorieën

• Gedachtenis (5)
• Gedicht van Oma (1)
• Gedichtenbundel (61)
• Hertalingen (6)
• Kamp Album (59)
• Leef je Leven (25)
• Limburgse taal (7)
• Mijn Gedichten (4)
• Sjrief mer plat (30)

 

---