11e van de 11e

De 11e van d’n 11e.

Op d’n 11^e van d’n 11^e sjtart ’t nuuj carnavalssezoen wir in ós Limburgs land. Ofwaal: Karneval/Vastelaovend. In eker geval: mèt Carnaval kómme gans get oetdrökkinge en weurd langs die mèt sjpas en oetgaon te make höbbe.

Vreuger heije de luuj nog e mommebakkes op, de sjtöppejas aan mèt dao ónger e dorissjtuupke of ‘ne sjollik um. Dat zuus te hujerdaags amper. Noe zuus te dèks de kleijaasj al van de optoch, terwiel dat vreuger gans sjtil woort gehoute. Mer op de dansvloer wurt nog ummer gepolonaesd.

Aan ’t befèt, biej ’t gaeve van e rundje, wurt waal ins gezag: Doog mich e glaas water, mer allein es ’r langs Wielder is gewaes. En gónt die rundjes hel, dan geit ’t wie de verkes. D’r is vas waal ins eine biej dae ummer es iésjte ’t glaas laeg haet, dae is dan sjuus wie verkes Wullem of dae geit wie Blucher. Dan kènt ’t gebeure dat ‘r zich lingelelaam zuup en dan dinger zaet aone bezej wo se dich hendig euver kèns versjangenere. Dan zjwieg se mer de moel en trèks dich dao de böl van aan.

’t Sjiekste is, es d’r ’n ouw mem in de buurt is dae zelfs e paerd gek kriet ofwaal eine dae zoa gek is wie ’n sjöp. Kuuf ‘r dich dan ouch nog eine, dan veul se dich hendig gepaesjkutteld. En dan is ’t tied um, um kwart op vot, klok kapot heivisj te gaon en sjteis te ‘t sjmörges op mèt ‘ne kop wie ’n riethamer. Alaaf!

  

De Hulsberger – jaargang 1 – editie 9 – november 2016

Wil ste mië weite euver de Limburgse sjpelling, kiek dan bv op Limburgse Sjpelling of op de Wikipedia: Sjepllingssjpiekpagina!

In 2001/2002 höb ich de Lièrgank Limburgs gevolgd dat georganiseerd woord door Veldeke en de Provincie Limburg. Sinds dae tied is de leefde veur de Limburgse Taal nog groater gewore. In 2016 haet de redactie van de Hulsberger mich gevraog um gastredacteur te zin veur de column: … dan sjrief mer plat. De sjtökke die ich gesjreve höb, kómme hiej allenèj langs. Ze gónt euver de Limburgse taal, ós dörp Hulsberg, ós Limburg of geweun get sjtómme kal.

Väöl plezeer mèt laeze!

 

---

Alle artikele op ’n riej
… dan sjrief mer plat!

 

---

Categorieën

• Gedachtenis (5)
• Gedicht van Oma (1)
• Gedichtenbundel (61)
• Hertalingen (6)
• Kamp Album (59)
• Leef je Leven (25)
• Limburgse taal (7)
• Mijn Gedichten (4)
• Sjrief mer plat (30)

 

---