09-07-2019

Synoniemen voor Sukkel

 

 

Anger weurd veur Sukkel.

Al ins naogedach wieväöl weurd veer gebroeke veur ‘ne sukkel? ’t Gekke mèt al die weurd is dat ze toch alleneij net neet ’t zelfde zin umtot ze ’n moment, sfeer of soort miensj aangaeve. Dèks geuf ‘t ’n geveul aan.

Pak ’t woord Sump of Deus, hiejmèt geuf se eigelijk aan dat dae miensj neet sjlum is. En ‘ne Koekwaus is daobiej ouch neet leuk. Mèt ‘ne Bleudhainie kèn se ouch nog um lache. Ènne dae óngehoebeld sjtóm dinger zaet is ‘ne Loemeleboer of ‘n  Óngetappetseeert kelderlaok.

... dan sjrief mer plat!
Laes hiej ’t artikel in de Hulsberger

En um de vocabulair nog get oet te breije: Dörpsgek, Sumpele heino, Häör, Döppesjurger, Zökkezuimer, Houve gare, Wieksnaas, Klotskop, Häörepeard, Kuke, Flabbes, Mafkaetel, Hutje moos, Depp, Hornoks, Votlaok, Draodaezel, Badmötsj, Kwiebes, Gewieksde, Knöppel, Soppegreun, Zaodruip, Druège, Sjpuit èllef, Oen, Oelewapper, Ouwkut, Hauve haan, Wiekse wielie, Uulskuke, Tute bölles, Sjtóm örgel, Sjaasj, Waus, Kauf, Kaufmozes, Sopbroor, Knoetsjpoekel, Aezel, Aerpel, Bruèdje, Kemièl, Pannekook, Droef, Hampeleman, Klophout, Toepes, Kumpke, Ödder, Zoutzak, Sjöppesjteel, Klojo, Ermen haus, Doe aij, Hoenes, Boebelaer, Sjaele wiekser.

Naeve tot ‘r allich nog miè weurd besjtónd, gebroeke v’r ouch oetdrökkinge:

Dae haet de kop los;
Sjtómmer es ’t echesjte van e verke of es ’t paerd van Christus;
Dea is in de boane erwte aan ’t plökke;
Dao mósse de oorlog mit winne, dan sjlik se van sjrik ‘ne kogel door;
Dae is mèt de gebaorte al veur de deur oet de drek getrókke.

En es lètste de bekènde oetdrökking veur eine van ’t duo Oetgesjlaope: Vot mèt oare.

 

De Hulsberger – jaargang 2 – editie 13 – maart 2017

Wil ste mië weite euver de Limburgse sjpelling, kiek dan bv op Limburgse Sjpelling of op de Wikipedia: Sjepllingssjpiekpagina!

Helga Keulen

In 2001/2002 höb ich de Lièrgank Limburgs gevolgd dat georganiseerd woord door Veldeke en de Provincie Limburg. Sinds dae tied is de leefde veur de Limburgse Taal nog groater gewore. In 2016 haet de redactie van de Hulsberger mich gevraog um gastredacteur te zin veur de column: … dan sjrief mer plat. De sjtökke die ich gesjreve höb, kómme hiej allenèj langs. Ze gónt euver de Limburgse taal, ós dörp Hulsberg, ós Limburg of geweun get sjtómme kal.

Väöl plezeer mèt laeze!

 

Alle artikele op ’n riej
… dan sjrief mer plat!

 

Categorieën